去日本「醫」肚痛
如果話「旅行能醫百病」，相信好多香港人都好認同。
曾經遇過一個個因肚痛而求診個案，一名中年男士話成日胃痛、肚痛，所以我哋傾好，等佢短期內去完日本旅行，再返嚟做身體檢查，check吓有冇生理毛病。
一個星期之後再見到呢位中年男士，佢話「好奇怪喎，我喺日本果幾日，咩痛都無喎！不過一落機返香港，又開始唔舒服！咁需唔需要檢查？」
其實佢嘅肚痛胃痛，好大機會係嚟自香港嘅壓力。
醫學上嘅名稱叫做「腸易激綜合症」，因為長期受壓力而導致腸胃功能唔好，所以好多時候去旅行，壓力放埋一邊，肚痛自然會好返。
當然無可能次次都去日本睇醫生啦，我哋會建議長期受到「腸易激綜合症」困擾嘅患者，都係去返家庭醫生睇睇會好啲。
